اسيايي پرمختيايي بانک د کليو د بيا رغونې او پرمختيا وزارت سره د انکشافي پروژو د تطبيق په برخه کې د خپلو مرستو د دوام ژمنه يو ځل بيا تازه کړله.

دغه ژمنه د مرکزي او لويديځې آسيا په برخه کې د دغه بانک لوي رييس باورنرليپاچ د افغانستان لپاره د دغه بانک د نوي ګومارل شوي رييس نندرا سنګرو د معرفي په مراسمو کې وکړله. د آسيايي پرمختيايي بانک رييس باورنرليپاچ د پرمختيايي پروژو د تطبيق د څرنګوالي په اړه د مالوماتو د وړاندې کولو تر څنګ پر خپل وخت د انکشافي پروژو د تطبيق په برخه کې د کليو د بيا رغونې او پرمختيا وزارت هڅې وستايلې. د کليو د بيا رغونې او پرمختيا وزير پوهندوي مجيب الرحمن " کريمي " له دغه وزارت سره د اسيايي پرمختيايي بانک شوې مرستې ګټورې وبللې او پدې توګه يې د دغو مرستو د دوام هيله څرګنده کړه. د يادونې وړ ده چې آسيايي پرمختيايي بانک د زراعتي محصولاتو د پياوړي کيدو پر مټ د کليوال اقتصاد د پياوړي کيدو په هدف د سيمه ييز پروګرام له لارې د کليو د بيا رغونې او پرمختيا له وزارت سره د اوبو لګولو د کليوالو پروژو د تمويل په برخه کې لسګونه ميليون ډالر له پخوا مرسته کړې او د دغو مرستو د دوام په بهير کې به دغه بانک د ارغنداب پروژې د تمويل تر څنګ په ډيرو نورو ولايتونو کې هم د اوبو لګولو کليوالې پروژې تمويل کړي.