په سمنګان کې د سپما ګروپونه جوړ شول
د کلیو بیارغونې او پراختیا وزارت د کلیوالي اقتصاد د پياوړتیا ملي پروګرام له لوري د سمنګان ولایت د ایبک او حضرت سلطان ولسوالیو اړوند شاوخوا ۱۲ پرمختیایې شوراګانو کې ۹۲ سپما ګروپونه، چې ۱۰۹۴ تنه پکې غړیتوب لري، جوړ کړي دي.
سربېره پر دې د پروګرام له لوري د نویو جوړ شویو سپما ګروپونو ته په یادو ولسوالیو کې د پروګرام د موخو او د پیسو سپمولو د ګټو په اړه روزنې ورکړل شوې دي.
د قرطاسیې بشپړ بنډلونه او د پیسو د سپما په موخه د بکسونو وېش هم له هغو وروستیو فعالیتونو څخه دي، چې د سیمه ییزه کارکوونکو له لوري په سمنګان ولایت کې ترسره شوي دي.
