په کونړ کې د یو میلیارد او ۱۲۴ میلیونه افغانیو په ارزښت د پرمختیایي پروژو چارې روانې دي
د کليو بیارغونې او پراختیا سرپرست وزیر پوهندوی مجیب الرحمن کریمي نن د کونړ له والي محمد اقبال سعید سره په لیدنه کې د یاد ولایت د خلکو ستونزې واوریدې.
د کونړ والي اقبال سعید وویل، د کلیو بیارغونې او پراختیا وزارت د بېلابیلو پروژو د پلي کېدو په سبب د دولت او خلکو ترمنځ همکاري ښه شوې او د خلکو په ژوند یې ښه اغېزه لرلې ده.
ددې ترڅنګ یې د ترانسپورټي لارو رغولو، استنادي دیوالونو او ښوونځيو ته د ودانیو جوړولو غوښتنې د کليو بیارغونې او پراختیا وزیر سره شریکې کړې.
د کليو بیارغونې او پراختیا وزیر وویل، امکاناتو ته په پام به د کونړ د خلکو ستونزو ته رسیدګي کیږي او همدا مهال په کونړ کې د څه باندې یو میلیارد او ۱۲۴ ميلیونه افغانیو په ارزښت د ۲۷۶ پرمختیایي پروژو چارې روانې دي او ددې ترڅنګ به ډير ژر په کونړ کې ۲۰۰ ښوونځيو ته د ودانیو د جوړولو چارې هم پیل شي.
