په زابل کې د څه باندې ۵ میلیونه افغانیو په لګښت د اوبو لګولو د کاریز د جوړولو کار روان دی
د کلیو بیا رغونې او پراختیا وزارت د سیمه ییز پروګرام له لوري د زابل ولایت د میزان ولسوالۍ په کاریزک کلي کې د څه باندې ۵ میلیونه افغانیو په لګښت د اوبو لګولو پوخ کاریز او ځمکو ته د اوبو رسوونکی پوخ کانال جوړیږي. د اوبو لګولو د دې کاریز د پروژې کار ۷۵ سلنه مخ ته تللی دی. د یادې پروژې د تطبیق پر مهال ۱۸۴۷ کاري ورځې رامنځته کیږي او په بشپړیدو به یې د سیمې ۱۷۵۰ اوسیدونکي ترې ګټه پورته کړي. د یادونې وړ ده چې د دغې پروژې په بشپړیدو به هلته نه یواځې د سیمې د بزګرانو ۲۰۰ جریبه کرنیزه ځمکه د اوبو لګولو تر منظم پوښښ لاندې راشي بلکې دغو ځمکو ته د اوبو د رسیدو په لار کې به د اوبو د بې ځایه ضایع کیدو مخه هم نوره ونیول شي.
