په زابل ولایت کې کوچیانو او د هغوی څارویو ته د څښلو اوبو د برابرولو چارې روانې دي
کلیو بیارغونې او پراختیا وزارت د ولسي تړون ملي پروګرام له لوري د زابل ولایت په مرکز قلات ښار کې د کوچیانو د پراختیا برنامې تر سیوري لاندې، کوچیانو ته د څښلو پاکې اوبه او د هغوی څارویو ته د څښلو اوبو د برابرولو کار روان دی.
په دغه پروژه کې چې د ملا محمد جان آخند د ګرځنده او نیمه ګرځنده کوچیانو د ایلبند د پراختیایي شورا لخوا پلې کیږي، د ۱۲ مکعبه متره اوبو په ظرفیت د یوې زیرمې، د ۱۰۰ مترو په ژوروالي د اوبو د یوې څاه او د ۲۵ مترو په اوږدوالي د څارویو لپاره د اوبو څښلو د یو آخور جوړول شامل دي. د دې پروژي په بشپړیدو سره به د یادي شورا د ګرځنده او نیمه ګرځنده کوچیانو ۱۰۰ کورنۍ او همدارنګه د دوی ۱۲۰۰ څاروي به ترینه ګټه واخلي. د یادونې وړ ده، چې د نوموړې پروژې د جوړیدو کار تر اوسه ۳۰ سلنه پرمخ تللی دی.
