په میدان وردګو ولایت کې د دوو پراختیایي پروژو چارې پيل شوې
د میدان وردګو ولایت د کلیو د بیارغونې او پراختیا ریاست له لوري د دغه ولایت د سیدآباد ولسوالۍ په موسی خېلو او ښادي خېلو کلیو کې د (۱۶،۳) میلیونه افغانیو په لګښت د دوو پراختیایي پروژو چارې پيل شوې.
په دغو پروژو کې د اوبو رسولو یوې شبکې او د (۴۸) مترو په اوږدوالي او (۶) مترو لوړوالي سره د اوبو د یوه کوچني بند جوړول شامل دي.
د یادو پروژو د کار په بهیر کې به لسګونه تنه کاریګرو ته د کار زمینه برابره او په بشپړېدو سره به يې د نوموړیو کلیو (۵۴۰) کورنۍ د څښاک پاکو اوبو ته لاسرسی او د باران اوبه مهار او د ځمکې لاندې اوبو سطح لوړه وساتل شي.
