د کندز په خان اباد ولسوالۍ کې د ښوونځي د ودانۍ چارې روانې دي
د کلیو بیارغونې او پراختیا وزارت د ولسي تړون ملي پروګرام د اقراء پروژې تر سیوري لاندې د کندز ولایت د خان اباد ولسوالۍ د خوب دره کلي لپاره د ښوونځي د ودانۍ جوړولو کارونه روان دي. د ښوونځي دغه وداني به چې اوس یې کارونه ۹۰ سلنه بشپړ شوي، یوه اداري او ۶ درسي خونې او ۳ تشنابونه ولري چې د یاد کلي ۱۴۶ نجونو او هلکانو ته به د زده کړو وړ چاپېریال برابر کړي.
د ښوونځي لپاره د جوړیدونکې ودانۍ د کار په بهیر کې به د سیمې تخنیکي او نا تخنیکي کاریګرو ته ۲۳۸۵ کاري ورځې هم برابرې شي.
د ولسي تړون اقراء پروژې لخوا د کندز په خان اباد ولسوالۍ کې ۳۷ ښوونځيو ته ودانۍ جوړیږي چې تراوسه یې د ۹ ودانیو کارونه بشپړ شوي دي.
