د کلیو د بیارغونې او پراختیا وزارت محترم وزیر د یونیسف دفتر له استازي او مل پلاوي سره وکتل
د کلیو د بیارغونې او پراختیا وزارت محترم وزیر الحاج ملا عبداللطیف منصور نن په خپل کاري دفتر کې د یونیسف دفتر له استازي ډاکټر تاج الدین او مل پلاوي سره لیدنه وکړه.
د لیدنې په پیل کې د یونیسف دفتر استازي ښاغلي تاج الدین د یاد دفتر د پروژو او فعالیتونو په اړه د کلیو د بیارغونې او پراختیا محترم وزیر ته معلومات ورکړل او وویل: زه ډیر خوښ یم چې ستاسو وزارت سره په همغږۍ د هېواد په لرو پرتو سیمو کې د خلکو د اړتیاوو پربنسټ پروژې پلي کړي او په دې وروستیو کې زلزله ځپلو او کډوالو ته ډیره پاملرنه کړې او کوښښ کوو ترڅو د اوبو رسولو په برخه کې ډیرې پروژې عملي کړو. همداراز نوموړي زیاته کړه چې له بده مرغه په افغانستان کې د پاکستان له لوري د تیري له کبله کډوالو ته مرګ ژوبله اوښتې او د یونیسف دفتر مشرتابه د پاکستان دغه کار غندي.
ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور د یونیسف دفتر استازي ښاغلي تاج الدین او ورسره مل پلاوي ته د ښه راغلاست ترڅنګ وویل: زه ستاسو له همکاریو څخه مننه کوم چې په هېواد مو ډیر کارونه کړي او کوئ، کوښښ وکړئ چې پروژې په ښه کیفیت او پروخت بشپړې شي ترڅو خلک ورڅخه په سمه توګه ګټه پورته کړي.
محترم وزیر صاحب زیاته کړه هغه کډوال چې له کمپونو څخه بېځایه شوي تاسې باید ورته د اوبو رسولو او نورو برخو کې همکاري وکړئ.
په پای کې د دواړو لوریو ترمنځ پر لا زیاتو همغږۍ ټینګار وشو.
