د کلیو پراختیا د انسټیټیوټ له خوا د ( چهارشنبه علمي) لومړی سیمینار تر سره شو
د ( چهار شنبه علمي) لومړی سیمینار د ( ښاري ژوند په پرتله د کلیوالي ژوند پایښت) تر سرلیک لاندې د کلیو پراختیا انسټیټیوټ له خوا د ولسمشر د پخواني سلاکار عبدالحمید هلمندي او د کلیو بیا رغونې او پراختیا وزارت د پروګرامونو د معین په شتون کې ددغه وزارت په مرکزي تالار کې تر سره شو.
د سیمینار په پیل کې د وزارت د پروګرامونو معین پوپل حبیبي د پرګرامونو د تطبیق تر څنګه د کلیو بیا رغونې او پراختیا سره اړوند سیمینارونه اغیزناک وبلل او ویې ویل ( هیله ده چې د علمي سیمینارونو په جوړولو سره وتوانیږو چې نړیوالې علمي تجربې د دغه وزارت د پرمختیايي پروګرامونو د ښه تطبیق په موخه راولیږدوو او له معتبرو نړیوالو علمي بنسټونو سره د همغږۍ په پایله کې له دغه سکتور سره اړوند سیمینارونه ډیر جوړ کړو)
همدا راز د کلیو پراختیا انسټیټیوټ مشر توریالي طنین وویل دا ریاست لټه کوي چې د دې وزارت د چارو لپاره د نویو روشونو د ماډلونو پر بنسټ پروګرامونه جوړ کړي او له دې لارې پر وخت خلکو ته د خدمتونو رسولو په برخه کې د هغوی رضایت چې اغیزناک او له حالاتو سره سم وي کچه یې لوړه شي.
یاده دې وي چې د ( چهار شنبه علمي) سیمینار د علمي څيړنو، د کلیو د پراختیا په برخه کې د شویو مطالعاتو او په دې برخه کې د ننګونو او فرصتونو د ارزولو په موخه جوړ شوی و چې د وزارت ۵۰ تنو کارکوونکو په کې ونډه اخستې وه.
