په خوست کې د ۶.۳ کیلو متره پاخه سړک د جوړولو کار روان دی
په خوست ولایت کې د کلیو د بیا رغونې او پرمختیا وزارت د سیمه ییز پروګرام له لوري د پاخه سړک د پروژې کار شا او خوا ۹۰ سلنه مخ ته تللی دی. د دغې پروژې په ترڅ کې د یاد ولایت په مندوزیو ولسوالۍ کې د ۶.۳ کیلو مترو په اوږدوالي پوخ سړک جوړیږي.
د یادې پروژې د تطبیق پر مهال چې له ملي بودیجې تمویل شوې۹۴۸۷ کاري ورځې رامنځته کیږي او په بشپړیدو به یې د سیمې ۱۳۲۴۳ اوسیدونکي ترې ګټه پورته کړي. د یادونې وړ ده چې د دغې پروژې په بشپړیدو به نه یواځې د سیمې د اوسیدونکو د تګ او راتګ ستونزه حل شي بلکې مارکیټونو ته د ځايي بزګرانو د کرنیزو توکیو په لیږد کې به هم مثبت اغیز وشیندي.
