د پکتیکا ۱۸۵ ښوونځيو ته ودانۍ جوړیږي، چې ۵۶ یې بشپړې شوې دي
د کلیو بیا رغونې او پراختیا وزیر پوهندوی مجیب الرحمن کریمي د پکتیکا له والي ډاکټر مجیب الرحمن څمکني او ولایتي شورا ځينو غړو سره په لیدنه کې د یاد ولایت د خلکو ستونزې وارویدې.
په پیل کې د پکتیکا والي د کلیو بیا رغونې او پراختیا وزارت د پرمختیایي پروژو اغېزه د خلکو پر ژوندانه ګټوره یاده کړه او زیاته یې کړه، چې د پکتیکا ۸۰ سلنه خلک په کرنه بوخت دي او د اوبو مدیریت یې د ژوندانه حالت د ښه کولو په برخه کې بنسټیز رول لري.
د کلیو بیا رغونې او پراختیا وزیر پوهندوی مجیب الرحمن کریمي وویل، د پکتیکا د ټولو اوبیزو حوزو د مدیریت په موخه تخنیکي سروې بشپړه شوې ده، چې د اوبو د مدریت په پنځه کلن پلان کې به ورته ځانګړي پاملرنه وشي.
د کليو بیارغونې او پراختیا وزیر زیاته کړه، چې متوازنه پرمختیا او د پروژو کیفیت د وزارت د کړنلارې محوري ټکي دي او په ټوله کې د دولت تمرکز محرومو ولایتونو ته په لا ډيرې پاملرنې دی.
د یادونې وړ ده، چې په پکتیکا ۱۸۵ ښوونځيو ته ودانۍ جوړیږي، چې ۵۶ یې بشپړې شوې دي او د دې ترڅنګ ۳۲۴ نورو پرمختیایي پروژو چارې هم روانې دي.
