کلیوالو ته د کرونا وایروس په اړه عامه پوهاوی په چټک ډول روان دی
د کلیو بیارغونې او پراختیا وزارت د کلیوالي اقتصاد د پیاوړتیا ملي پروگرام ولایتي کارمندان هڅه کوي، چې د خپلو ورځنیو چارو تر څنګ کلیوالو ته د کرونا وژونکي وایروس په اړه عامه پوهاوی هم ورکړي، چې په څه ډول سره کولای شي، ځانونه او کورنۍ له دې وایروس څخه په امان کې کړي.
د خوست ولایت د اسماعیلخېلو او مندوزي ولسوالۍ هغه سیمې دي، چې د کلیوالي اقتصاد د پیاوړتیا ملي پروگرام کارمندان پهکې د ورځنیو چارو تر څنگ هره ورځ کلیوالو ته د کرونا وایروس په اړه معلومات ورکوي. د عامه پوهاوي پهدې کمپاین کې کارمندان کلیوالیو ته د چاپي موادو د ورکړې تر څنگ د عامې روغتیا وزارت هغه سپارښتنې تر کلیوالو رسوي، چې د کرونا وایروس د مخنیوي او وقایې په برخه کې شریکې شويدي.
د کرونا وایروس د خپرېدا د مخنیوي په برخه کې له حکومت او په ځانگړي ډول د عامې روغتیا له وزارت سره د کلیوالو د همکارۍ جلبول هغه څه دي، چې د کلیو بیارغونې او پراختیا وزارت د ولایتي کارمندانو له لوري بار بار کوښښ کېږي، چې کلیوالي تشویق کړي، چې د عامې روغتیا وزارت سپارښتنې ومني.
د یادونې وړ ده، چې په خوست ولایت کې د کلیو بیارغونې او پراختیا وزارت د کلیوالي اقتصاد د پياوړتیا ملي پروګرام د کارمندانو له لوري د کرونا وژونکي وایروس د خپرېدو د مخنیوي چاپي مواد د کارمندانو په شخصي لګښت چاپ شويدي، چې دا د دوی د لوړ او عالي احساس ښکاروندی دي.
