د پکتیا په لجه منګل ولسوالۍ کې د ۲۵ ميليونه افغانیو په ارزښت د څلور کیلومتره سړک د جوړولو چارې پیل شوې
د کليو بیارغونې او پراختیا وزارت د کلیوالي لار جوړولو ملي پروګرام له لوري د پکتیا ولایت په لجه منګل ولسوالۍ کې د حرم کلي د نوي جوړېدونکي سړک چارې د پکتیا والي شمیم خان کټوازي له لوري پیل شوې.
دغه سړک د څلور کېلومتره په اوږدوالي او پنځه متره پلنوالي سره د ګردېز – پټان له سړک څخه نیولې تر حرم کلي پورې په خامه ډول جوړیږي چې په مسیر کې به یې د غرونو کټېنګ (پرې کولو) همواره کاري، پلچکونو او استنادي دېوالونو په پاخه ډول د جوړولو چارې هم ترسره شي.
د کلیو بیا رغونې او پراختیا رئیس فضل هادي عاصم په وینا دغه سړک د کلیو بیارغونې او پراختیا وزارت د کلیوالي سړکونو د جوړولو ملي پروګرام له لوري د پنځه ویشت ملیونه افغانیو په لګښت د حرم کلي د دوو پرمختیایي شوراګانو په لاس جوړیږي چې په اته میاشتو کې به یې چارې بشپړې شي.
