په کونړ او نورستان کې د اوبو رسولو ۲ شبکې بشپړې شوې
د کليو بيا رغونې او پراختيا وزارت د اوبو رسولو او کليوالي حفظ الصحي د ملي پروګرام له لوري د ۴ ميليونه او ۸۰۰ زره افغانيو په ارزښت د کونړ ولايت د مرورې ولسوالۍ په ګرداب او د نورستان ولايت د نورګرام ولسوالۍ په کنده کلي کې د اوبو رسولو دوه پروژې بشپړې او ګټې اخستنې ته وسپارل شوې. دا پروژې د يونيسيف ادارې له خوا تمويل شوې وې. ددې پروژو په ترڅ کې کليوالو خلکو ته ۲۴۰ کاري ورځې رامنځ ته شوې وې. او په پايله کې يې ۴۰۰ کورنۍ د څښاک له پاکو او صحي اوبو برخمنې شوې.
