د کلیو بیارغونې او پراختیا وزیر پوهندوی مجیب الرحمن کریمي د هیواد په ۲۳ ولایتونو کې د۱ میلیارد او ۴۵ میلیونه افغانیو په ارزښت د ۹۴ پرمختیایي پروژو هوکړه لیکونه لاسلیک کړل.
د کلیوبیارغونې او پراختیا وزیر پوهندوی مجیب الرحمن کریمي د هیواد په ۲۳ ولایتونو کې د پرمختیایي شوراګانو او ځینې خصوصي شرکتونو سره د ۹۴ پرمختیایي پروژو تړونونه لاسلیک کړل. دا پروژې چې د هیواد له ملې بودیجې تمویلیږي د کلیوبیارغونې او پراختیا وزارت د سیمه ییزو پروګرامونو د همغږۍ دفتر له لوري پلې کیږي.
د کلیوبیارغونې او پراختیا وزیر ددې پروژو د تړون د لاسلیک کولو په خبري غونډه کې وویل: (دا ۹۴ پروژې چې ټولیز لګښت یې ۱ میلیارد او ۴۵ میلیونه افغانۍ دی او ۱۰ سلنه د خلکو ونډه هم په کې ده، په بدخشان، بادغیس ، بغلان ، فراه، غور، کابل، کندهار، کاپیسا،خوست، کونړ، کندز، لوګر، ننګرهار، پکتیا، پنجشیر، پروان، تخار، میدان وردګو، غزني، لغمان، پکتیکا، نورستان او زابل ولایتونوکې تطبیقیږي.)
ښاغلي کریمي زیاته کړه چې ددې پروژو د تطبیق په ترڅ کې د کلیوالو لپاره ۳۱۴ زره کاري ورځې رامنځته کیږي او نږدي ۲۰۵ زره تنه به ترې کټه پورته کوي.
باید ووایو چې په دې پروژو کې د محافظتي او استنادي دیوالونو جوړول، د اوبو لګولو کانالونه،ترانسپورتې پلونه، د دویمې درجې کلیوالي سړکونه، ګبیوني او بولډر دیوالونه، کانکریټي سړکونه، کاریزونه او سربندونه راځي.
