په کاپیسا کې د ۹۴ میلیونه افغانیو په ارزښت د ۲ سړکونو جوړولو کار روان دی
د کلیو بیا رغونې او پراختیا وزارت د کلیوالي لار جوړولو ملي پروګرام له لوري د کاپیسا ولایت په مرکز او حصه دوم کوهستان ولسوالۍ کې د ۹۴ میلیونه افغانیو په لګښت په ټولیزه توګه د ۷.۸۷۵ کیلو متره په اوږدوالي د دوو سړکونو جوړولو کار روان دی.
له دې پروژو یوه یې د ۶۷ میلیونه افغانیو په ارزښت له قلعه سیدخان څخه تر قلعه صحرا دشت پورې د ۵.۲۶۵ کیلو متره کانکریټي سړک جوړول دي او بل د ۲۷ میلیونه افغانیو په لګښت له ملا رسول کلي څخه تر خدایارخیلو پورې ددویم کانکریټي سړک جوړول دي چې د ۲.۶۱ کیلو متره اوږدوالی لري.
باید ووایو چې د دې پروژې په بشپړتیا سره به ده د قلعه سیدخان، کیشکتان علیا، سید میرخیلو، فیض علي خیلو، میرجي خیلو، قلعه صحرا دشت، ملا رسول بابا او خدایارخیلو کلیو د اوسیدونکو ترانسپورتي ستونزې هوارې شي.
