په کابل کې ۱ میلیون افغانیو په ارزښت د یو کرنیز کانال د جوړولو کار بشپړ او ګټې اخیستنې ته وسپارل شو
د کلیوبیارغونې اوپراختیا وزارت د ولسي تړون ملي پروګرام له لوري د کابل ولایت د چهارآسیاب ولسوالۍ په ده بر کلي کې د څه باندې یو میلیون افغانیو په لګښت د یوه کرنیز کانال د جوړولو چارې بشپړې شوې.
دا کانال ۲۶۰ متره اوږدوالی، ۱۶ متره سوپر پسیج ،۵۰ متره محافظوي دېوال او ۱۹ حقابې لري چې د ځايي خلکو۱۵۰جرېبه کرنيزه ځمکه به خړوبه کړي او ۱۳۰ کورنیو ته به یې ګټه ورسیږي. او د یادې سیمې تخنیکي اوناتخنیکي کاریګرو لپاره يې ۸۵۲ کاري ورځې برابرې کړې.
د يادونې وړ ده، چې د کابل ولايت بګرامیو، چهاراسياب، موسهي، خاک جبار او ګلدرې ولسواليو کې د ولسي تړون ملي پروګرام له لوري د اوبو لګونې په سکټور کې د ۴۲۴۴۸ مترو په اوږدوالي د کانال جوړونې کارونه روان دي، ۴۰ سلنه یې چارې بشپړې شوي او پاتې نورې به يې په نږدې راتلونکې بشپړې او ګټې اخيستنې ته وسپارل شي چې شاوخوا ۳۴۲۰۶ جريبه کرنیزې ځمکې به د اوبه خور تر منظم پوښښ لاندې راولي.
