په کابل کې د کوچیانو د لومړنۍ پراختیایي شورا ټاکنې ترسره شوې
د کلیو د بیا رعونې او پراختیا وزارت د ولسي تړون ملي پروګرام د کوچیانو ایلبند د پراختیایي شورا لمړنۍ ټاکنې د ۷۹ کورنیو د استازو څخه د کابل ولایت اړوند د بګرامیو ولسوالۍ په تپهٔ ګردقول کلي کې ترسره شوې. په دې ټاکنو کې د ښځو او نارینه وو په ګډون په دې ټاکنو ۸۰ سلنه کوچیانو برخه اخیستی وه چې په پایله کې یې د پراختیایي شورا د رئیس، مرستیال، منشي او خزانه دار په شمول څلور کلیدي غړي د آزادو او رڼو ټاکنو له لارې، وټاکل شول.
په لمړي سر کې د تپهٔ ګردقول نقشه تشریح او د هغه په اړه د کوچیانو لپاره د ولسي تړون ملي پروګرام د روزونکو لخوا لازم معلومات وړاندې شول. وروسته بیا د کوچیانو د پراختایي شورا د پراختیایي پروژو د پلي کولو په منظور آزادې ټاکنې له صمیمیت نه په ډکه فضا کې ترسره کړې. د یادونې وړ ده چې د کابل ولایت د چهار آسیاب، موسهي، خاک جبار او ګلدرې په څلورو نورو ولسوالیو کې هم د کوچیانو ایلبند د پراختیایي شوراګانو د جوړیدو لپاره د ټاکنو کار روان دی.
