په پکتیکا ولایت کې د څه باندې ۴ میلیونه افغانیو په ارزښت دوه پرمختیايي پروژې ګټې اخستنې ته وسپارل شوې
د افغانستان د خپلواکۍ د سلمې کلیزې د لمانځنې په ویاړ د کلیو بیا رغونې او پرمختیا وزارت د ولسي تړون پروګرام له خوا د پکتیکا ولایت په مرکز شرنه او یحیی خیلو ولسوالۍ کې د څه باندې ۴ میلیونه افغانیو په ارزښت دوه پرمختیايي پروژې ګټې اخستنې ته وسپارل شوې یوه پروژه د یحیی خیلو ولسوالۍ په عقل الدین کلي کې د ۱۹۶۸ متره اوږده د څښاک د پاکو اوبه رسونې شبکه وه چې ۷ نلونه لري او په ۲۴ ساعتونو کې ۸۳ کورنیو ته ۲۵ لیتره اوبه برابروي.
بله پروژه د شرنې په مرکز یاروال کلي کې د اوبه خور ۴۳۹ متره اوږد او ۸۰ سانتي لوړ کانال دی چې ددې چارې په ترڅ کې ۱۰۲۵ فني او نا فني کارګرو ته د کار زمینه برابره شوې وه. دا کانال به د ۲۵۰ جریبه کرنیزې ځمکې د خړوبولو لامل وګرځي.
