په پکتیا ولایت کې د اوبو رسولو دوې شبکې ګټې اخیستنې ته وسپارل شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظ الصحې د پروګرام له لوري د ۳.۹ مېلیونه افغانیو په لګښت سره چې د یونیسف ادارې لخوا ورکړل شوې، د پکتیا ولایت د احمدآباد ولسوالۍ په سرکي ملنګ روغتیايي مرکز او د ځاځي آریوب ولسوالۍ په بره شګه سیمه کې د اوبو رسولو دوې لمریزې شبکې جوړې او د ځايي خلکو ګټې اخیستنې ته وسپارل شوې.
د څښلو د اوبو په لومړۍ شبکه چې د کلینیک لپاره جوړه شوه، نیم میلیون افغانۍ ولګېدې چې د یوې ژورې څاه کیندل، د دوو لمریزو ښیښو (سولرونو) نصبول، د څلورو نلکو نصبول او د څلور تشنابونو بیارغول په کې شامل وو.
د اوبو رسولو په دویمه شبکه چې په بره شبګه سیمه کې جوړه شوه، ۳.۴ میلیونه افغانۍ لګښت راغی، چې د یوې ژورې څاه کیندل، د اوبو د کانکریټي ذخیرې جوړول، د ۵۰ لمریزو تختو، ۲۵ نلکو او د پایپونو ۳۰۰ متره اوږدې شبکې نصبول په کې شامل وو.
د اوبو رسولو د یادو شویو شبکو په تکمیلیدو سره د احمد آباد د ولسوالۍ د سرکي ملنګ کلینک او د ځاځي آریوب ولسوالۍ د برې شګې سیمې د شاوخوا ۳۰۰ کورنیو لپاره د څښلو پاکې اوبه برابرې شوې.
