په ننګرهار کې د ۱۹.۶ میلیونه افغانیو په ارزښت د ۵۱۲ متره محافظوي دیوال جوړولو کار روان دی
په ننګرهار ولایت کې د کلیو د بیا رغونې او پراختیا وزارت د سیمه ییز پروګرام له لوري د ۱۹.۶ میلیونه افغانیو په ارزښت د محافظوي دیوال د جوړولو کار ۷۰ سلنه مخ ته تللی دی. د دغې پروژې په ترڅ کې د یاد ولایت د مهمند درې ولسوالي په علي جان کلا کلي کې له معیارونو سره سم د ۵۱۲ مترو په اوږدوالي پوخ محافظوي دیوال د جوړیدو په حال کې دی.
د یادې پروژې د تطبیق پر مهال ۲۳۲۲ کاري ورځې رامنځته کیږي او په بشپړیدو به یې د سیمې ۱۰۳۸ اوسیدونکي ترې په مستقیم ډول ګټه پورته کړي. د یادونې وړ ده چې د دغې پروژې له لارې به هلته نه یواځې د ځايي بزګرانو ۱۲۵ جریبه کرهڼیزه ځمکه بلکې د سیمې ګڼ شمیر کورونه هم د سیلابونو له ګواښ څخه خوندي کړلی شي.
