په ننګرهار کې د ۱.۸ میلیونه افغانیو په ارزښت د اوبو رسولو یوه شبکه تر ترمیم وروسته ګټې اخیستنې ته وسپارل شوه
د کلیو بیارغونې او پراختیا وزارت، په کلیوالي سیمو کې د اوبو رسولو او حفظالصحې د پروګرام له لوري د ننګرهار ولایت د دوربابا ولسوالۍ په «اُوغز» کلي کې د ۱.۸ میلیونه افغانیو په ارزښت د اوبو رسولو یوه جاذبيي شبکه تر ترمیم او بیارغولو وروسته د ځايي خلکو ګټې اخیستنې ته وسپارل شوه.
ددې شبکې په فعالیدو سره د شاوخوا ۴۰۰ کورنیو لپاره د څښاک پاکې اوبه برابرې شوې.
د اوبو رسولو په دغه پروژه کې د اوبو د سرچینې بیارغول، د پایپونو تمدید، د ذخیرو بیارغول او ترمیم، د نلبندانونو ترمیم او یو لړ نور فعالیتونه شامل وو. د اوبو رسولو دغې پروژې دغه راز د ځايي خلکو لپاره شاوخوا ۱۲۰ کاري ورځې هم رامنځته کړې.
