په ننګرهارکې د ۷۱۵ کورنیو لپاره د څښاک اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظالصحې د پروګرام له لوري د ننګرهار ولایت د چپرهار ولسوالۍ په دولتآباد او د خوګیاڼیو ولسوالۍ په سنډاخېلو کليو کې د ۷.۲ میلیونه افغانیو په لګښت د شاوخوا ۷۱۵ کورنیو لپاره په کورونو کې د څښلو پاکې اوبه برابرې شوې.
د اوبو رسونې په دغو دوو پروژو کې، د دوو لمریزو شبکو جوړولو شامل و، چې په تطبیق سره یې د خلکو په کورونو کې د نلونو په مرسته د څښاک پاکې اوبه برابرې شوې.
د اوبو رسونې یادې شوې پروژې د اړوندو کلیو د پرمختیايي شوراګانو پرمټ تطبیق شوې چې د جوړولو چارو یې د ځايي خلکو لپاره ۴۶۰۰ کاري ورځې هم رامنځته کړې.
