په میدان وردګ ولایت کې د (۱۱۶) بیلابیلو پراختیايې پروژو چارې پیل شوې
د کلیو د بیارغونې او پراختیا وزارت له لوري د میدان وردګ ولایت په جغتو ولسوالۍ کې د شاوخوا (۲۰۳) میلیونه افغانیو په لګښت د (۱۱۶) بیلابیلو پراختیايې پروژو چارې نن د یو لړ مراسیمو په ترڅ کې د دغه وزارت د محترم وزیر الحاج ملا محمد یونس اخندزاده صاحب او مل پلاوي له خوا پیل شوې.
د یادو پروژو د پیل په پار جوړ شوې مراسیمو کې د کلیو د بیارغونې او پراختیا وزارت وزیر الحاج ملا محمد یونس اخندزاده صاحب، مل پلاوي، د میدان وردګ ولایت مرستیال والي حافظ سعیدالرحمن صاحب، د ولایت د علماوو د شورا معاون مولوې عابد آغا ، د یادې ولسوالۍ ولسوال، د دغه ولایت د کلیو د بیارغونې او پراختیا رئیس، یو شمیر نورو مسؤولینو، علماء کرامو، سپین ږیرو او ځوانانو ګډون کړی وو.
په دغو پروژو کې د کلیوالي سړکونو، پلونو، پلچکونو، استنادي دیوالونو او کانالونو جوړول شامل دي
د یادو پروژو د کار په جریان کې به سلګونه تنه کاریګرو ته د کار زمینه برابره او په بشپړیدو سره به يې په اړوندو برخو کې د نوموړې ولسوالۍ د اوسیدونکو ستونزې هوارې شې.
