په میدان وردګو ولایت کې د اوبو رسولو د یوې شبکې د رغولو چارې بشپړې او ګټې اخیستنې ته وسپارل شوه
د کلیو د بیارغونې او پراختیا ریاست په تخنیکي همکارۍ او نظارت، د یونیسف ادارې په مالي مرسته د میدان وردګو ولایت د جغتو ولسوالۍ په عبدالرحيم خېلو سیمه کې د ۴.۳ میلیونه افغانيو په ارزښت د اوبو رسولو د یوې شبکې د رغولو چارې بشپړې او د یاد ولایت د کلیو د بیارغونې او پراختیا رئیس الحاج مولوي وحیدالله راشد له خوا ګټې اخیستنې ته وسپارل شوه.
دغه شبکه د لمريزې برېښنا سیسټم او د ٣٠ متره مکعب ذخیرې په لرلو سره د پنځو میاشتو په موده کې ورغول شوه چې د سیمې ٣٩۴ فني او ٢٨٦٢ غیر فني کارکوونکو ته کاري زمینه برابره کړې وه. همدارنګه د یادې شبکې په بشپړیدو سره ٢٠٠ کورنیو او د ښوونځي شاوخوا ٣٥٠ تنو زده کوونکو د څښاک پاکو اوبو لاسرسی پیدا کړ.
