په زابل کې د اوبو لګولو د کاریز د جوړولو کار روان دی
په زابل ولایت کې د کلیو د بیا رغونې او پراختیا وزارت د سیمه ییز پروګرام له لوري د ۳.۳ میلیونه افغانیو په ارزښت د اوبو لګولو د کاریز د جوړولو کار ۹۲ سلنه مخ ته تللی دی. د دغې پروژې په ترڅ کې د یاد ولایت د شهر صفا ولسوالۍ په سید محمدخان کلي کې له معیارونو سره سم د اوبو لګولو د کاریز څاګانې، د اوبو زیرمتون او د ۵۸۹ مترو په اوږدوالي د اوبو لګولو پوخ کانال د جوړیدو په حال کې دی.
د یادې پروژې د تطبیق پر مهال ۸۵۸ کاري ورځې رامنځته کیږي او په بشپړیدو به یې د سیمې ۸۴۰ اوسیدونکي ترې په مستقیم ډول ګټه پورته کړي. د یادونې وړ ده چې د دغې پروژې له لارې به هلته د ځايي بزګرانو ۲۵۰ جریبه کرهڼیزه ځمکه او باغونه د اوبو لګولو تر منظم پوښښ لاندې راشي.
