په خوست کې د پرمختیایي پروژو د جوړولو کار روان دی
د کلیو بیا رغونې او پراختیا وزارت د سیمه ییز پروګرامونو د همغږی دفتر له لوري د خوست ولایت مرکز اړوند په ضبطي ماڼۍ کلي کې د ۵۵ مترو په اوږدوالي د اوبو لګولو پوخ سربند، د ۱۰۳ مترو په اوږدوالي د اوبو لګولو پوخ کانال، د ۶۰ مترو په اوږدوالي پوخ وزري دیوال او د ۴۰۰ مترو په اوږدوالي استنادي دیوال د جوړیدو کار ۳۵ او ۶۰ سلنه مخته تللی دی.
د یادو پروژو د تطبیق پر مهال کاریګرو ته ۱۲۴۷۷ کاري ورځې رامنځته شوې او په بشپړیدو به یې د سیمې ۸۴۰ اوسیدونکي ترې ګټه پورته کړي. د یادونې وړ ده، چې د دغو پروژو په بشپړیدو به د سیمې ۳۰۰ جریبه کرنیزه ځمکه د اوبو لګولو تر منظم پوښښ لاندې راشي او تر څنګ به یې ګڼ شمیر کورونه هم د موسمي سیلابونو له زیان څخه خوندي شي.
