په بادغیس ولایت کې د اوبو رسولو دوه شبکې او د اوبو تصفیې سیسټم ګټې اخیستنې ته وسپارل شول
د کلیو د بیارغونې او پراختیا وزارت له لوري د بادغیس ولایت په مرکز قلعه نو، بالا مرغاب او قادس ولسوالیو کې د (۱۴،۵) میلیونه افغانیو په لګښت د اوبو رسولو دوو شبکو او د اوبو تصفیې سیسټم د جوړولو چارې بشپړې او د یوې غونډې په ترڅ کې د دغه وزارت د محترم وزیر الحاج ملا محمد یونس اخندزاده صاحب او مل پلاوي له خوا ګټې اخیستنې ته وسپارل شول.
په دغو شبکو کې د (۱۳۸۸۷) مترو په اوږدوالي پایپ غځول، د (۲۴۱) شیردهنونو او (۵۲) سولر تختو نښلول شامل دي.
د یادو پروژو د کار په جریان کې لسګونه تنه کاریګرو ته د کار زمینه برابره شوې وه او په بشپړیدو سره يې د مرکز او نوموړیو ولسوالیو (۱۰۵۰) کورنیو د څښاک پاکو اوبو ته لاسرسی پیدا کړ.
