د کلیو د بیارغونې او پراختیا وزارت کې د روزنیز ورکشاپ څخه د ۳۴ تنه کارکوونکو فراغت
د کلیو د بیارغونې او پراختیا وزارت ۳۴ تنه کارکوونکي د اداري، مالي او تدارکاتي روزنیز ورکشاپ څخه چې د یاد وزارت د کلیو پراختیا انسټیټوټ له خوا د یوې میاشتې لپاره دایر شوی و، فارغ شول او نن د یوې غونډې په ترڅ کې خپل تصدیق نامې ترلاسه کړل.
په یاده غونډه کې د کلیو د بیارغونې او پراختیا وزارت د کلیو د ودانیزو چارو معین مفتي سید احمد مستقیم، د مالي او اداري معین مولوي عبدالرحمن حلیم، د تدارکاتو رئیس مولوي فضل الرحمن عاصم، د انسټیټوټ رئیس مولوي خیال محمد عاصم، د داخلي تفتیش رئیس مفتي محمد هاشم ذاکر او د وزارت کارکوونکو ګډون کړي وو.
د کلیو د بیارغونې او پراختیا وزارت د کلیو د ودانیزو چارو معین مفتي سید احمد مستقیم د فارغ شویو کارکوونکو د تشویق او ستاینې ترڅنګ ژمنه وکړه چې په راتلونکې کې به د کارکوونکو د ظرفیت د لوړولو لپاره لنډمهاله روزنیز پروګرامونه دایروي.
همدارنګه د انسټیټوټ رئیس مولوي خیال محمد عاصم غونډې ته وینا وکړه او وویل چې مونږ د څو میاشتو راهیسې په بیلابیلو برخو کې د وزارت کارکوونکو ته ورکشاپونه او سمینارونه دایر کړي چې ځینې يې پای ته رسیدلي او ځينې يې لاهم دوام لري.
دغه غونډه د تصدیق نامو په ویش او د کلیو د بیارغونې او پراختیا وزارت د مالي او اداري معین مولوي عبدالرحمن حلیم د خیر په دوعا سره پای ته ورسېد.
