د کلیو د بیارغونې او پراختیا وزارت سرپرست وزیر د یونیسف ادارې له استازو سره ناسته وکړه.
د کلیو د بیارغونې او پراختیا وزارت سرپرست وزیر، جلالتمآب ملا محمد یونس اخنــدزاده، نن/یکشنبه په خپل کاري دفتر کې په افغانستان کې د ملګرو ملتونو د ماشومانو د ملاتړ ادارې (یونیسف) له استازو سره وکتل او د هېواد په کلیو کې د څښاک د اوبو، حفظالصحې او پاکوالي (واش) د پروګرام د تطبیق په اړه یې ورسره خبرې وکړې.
په دغه ناسته کې د کلیو د بیارغونې او پراختیا وزارت د کلیو د ودانیزو چارو معین، مفتي سید احمد مستقیم؛ د یونیسف ادارې د واش برخې مسوول، پاولُس ورکنې؛ د وزارت د اوبو رسولو او پلان او پالیسۍ رئیسانو او د یونسیف او وزارت د واش برخې تخنیکي کسانو هم ګډون درلود.
د ناستې په پیل کې د کلیو د بیارغونې او پراختیا سرپرست وزیر د یونیسف ادارې استازو ته د ښه راغلاست ترڅنګ په افغانستان کې د یونیسف ادارې روان کارونه او فعالیتونه وستایل. نوموړي وویل چې اوس افغانان د پخوا په نسبت زیاتې ستونزې لري، ځکه چې ګڼو نړیوالو ادارو خپلې چارې ودرولې؛ یوازې یونیسف اداره ده چې په افغانستان کې خپلو فعالیتونو ته دوام ورکوي.
د کلیو د بیارغونې او پراختیا وزارت سرپرست وزیر ټینګار وکړ چې پروژې باید په ډېر شفاف ډول او هغو ساحو کې تطبیق شي چې زیاته اړتیا ورته لیدل کیږي. نوموړي دغه راز وویل چې د مرکزي بانک سره یې خبرې کړې چې د پروژو لپاره د پیسو د ورکړې ستونزه هواره شي. غونډې ته په خبرو کې، د کلیو د بیارغونې او پراختیاوزارت سرپرست وزیر همدار راز وویل چې دوی کوښښ کوي چې د افغانانو لپاره د کار زمینه برابره کړي.
د یونیسف ادارې د واش برخې مسوول د کلیو د بیارغونې او پراختیا له سرپرست وزیر څخه د مننې ترڅنګ څرګنده کړه چې یونیسف اداره پلان لري چې په افغانستان کې خپل فعالیتونه د پخوا په نسبت څو چنده زیات کړي ترڅو ډېرو خلکو ته د څښاک د اوبو او حفظالصحې آسانتیاوې برابرې کړي.
۲۰/جمادی الثاني/۱۴۴۳هـ.ق
۰۳ سلواغه ۱۴۰۰ هـ.ش
