د کلیوالي اقتصاد د پياوړتیا ملي پروګرام له لوري سپما ګروپونو او د پور او سپما کلیوالي اتحادیو ته د مقطعي پانګې د ورکړې لړې په هرات ولایت کې پیل شوه
د کلیو بیارغونې او پراختیا وزارت د کلیوالي اقتصاد د پیاوړتیا ملي پروګرام له لوري په هرات ولایت کې سپما ګروپونو او د پور او سپما کلیوالي اتحاديو ته د وړیا نغدي مرستې د ورکړې لړې د کلیو بیارغونې او پراختیا وزارت د مالي او اداري مرستیال ښاغلي معراجالدین شمس، د پروګرام زون مسوولینو، قومي مشرانو، او رسنیو پر وړاندې رسماً پیل شوه.
په لومړي پړاو کې د هرات ولایت په انجیل، ګذره، کرخ او کشک رباط سنګي ولسوالیو کې د پور او سپما۷۰ کلیوالي اتحادیو او ۶۴۲ سپماګروپونو ته ۶.۲ مېلیونه افغانۍ وړیا مرسته ترسره شوه.
د بلاعوضه مرستې له ورکړې څخه موخه د پور او سپما په کلیوالي اتحادیو کې د پیسو زیاتول، مالي سرچینو ته د لاسرسي په برخه کې د اسانتیاو برابرول او د کلیوالو هڅول چې له دې سرچینو څخه د خپلو اقتصادي او تولیدي فعالیتونو د پیاوړتیا او پرمختیا لپاره ګټه پورته کړي. چې په دې کار سره به په مستقیم او غېر مستقیم ډول د لاسي صنایعو، تولیداتو د جوړولو، د خوراکي توکیو د پروسس، غالۍ اوبدلو، دوکاندارۍ، کرنې، مالدارۍ او داسې نورو برخو کې خلکو ته بوختیاوې رامنځته شي.
د یادونې وړ ده چې په دویم پړاو کې به ۱۲ مېلیونه افغانۍ وړیا مرسته د پور او سپما په ۴۰ کلیوالي اتحادیو او ۳۱۱ سپما ګروپونو ووېشل شي.
