د کابل په موسهي ولسوالۍ کې د ۱۷،۸ ميلیونه افغانیو په ارزښت د کرنیزو ځمکو د اوبه کولو کانال چارې پیل شوې
د کلیو بیارغونې او پراختیا وزارت د سېمه ییز پروګرام له لوري د کابل ولایت په موسهي ولسوالۍ کې د یو ستر کانال چارې د وزارت د ولایتي رئیس اول خان احمدزي او د ځایي مشرانو لخوا پیل شوې.
د کرنیزو ځمکو د اوبو کولو یاد کانال چې ۴۵۸۰ متره اوږدوالی لري، د سېمې څه باندې ۵ زره جرېبه کرنیزه ځمکه او ګڼ باغونه به خړوبوي، په دې کانال ۱۷،۸ ميلیونه افغانۍ لګښت کېږي، چې له ۳۰۰ څخه ډيرې کورنۍ به له دې کانال څخه ګټه اخلي.
د دې کانال د جوړولو په کاري بهیر کې ۵۲۷۱ کاري ورځې هم رامنځته کېږي او د سېمه ګڼ ځوانان به په کې په کار بوخت وي.
د کلیو بیارغونې او پراختیا وزارت هڅې کوي، چې محرومو ولسونو ته ځان ورسوي او د دوی ستونزې حل کړي، د دې ترڅنګ په ټولو پروژو کې کېفیت وزارت ته لومړیتوب لري.
