د کابل ولایت په سروبي ولسوالۍ کې د ۱۳۲ ميليونه افغانیو په ارزښت د استنادي دیوال چارې پیل شوې
۱۳۹۸/وری /۱۵
د کليو بيارغونې او پراختيا وزير پوهنمل مجيب الرحمن کريمي د کابل ولايت په سروبي ولسوالۍ کې د ۴۲۶۵ متره اوږد استنادي ديوال د بنسټ ډبره چې د ياد وزارت د سيمه ييزو پروګرامونو د همغږۍ دفتر لخوا جوړ کېږي، کېښوده. د کليو بيارغونې او پراختيا وزير پوهنمل مجيب الرحمن کريمي د سېمې خلکو ته په هغو مراسمو کې چې په همدې موخه جوړ ول، وويل، چې په ياد ديوال نږدې ۱۳۲ ميليونه افغانۍ لګښت کېږي، چې په کاري بهير کې به يې د سېمې خلکو ته ۷۸۵۹ کاري ورځې رامنځته شي او اته زره کورنۍ به ترې ګټه اخلي. ښاغلي کريمي زياته کړه، چې د دې پروژې ارزښت په دې کې دی، چې د سيلاب د اوبو سرعت به کم کړي، زياتې کرنيزې ځمکې او کورونه به د سيلابونو له خطره خوندي کړي، شاړې ځمکې به په کرنيزو ځمکه بدلې کړې او د دې ترڅنګ به د سروبي په بند کې د ريګونو او تېږو د لويدو څخه هم ساتنه وکړي. د يادونې وړ ده، چې د سروبي ولسوالۍ يوه غرنيزه ولسوالۍ ده، چې وخت نا وخت په کې د سيلابونو له وجهي خلکو ته تاوانونو رسيږي.
