د ملي دسترخوان پروګرام به د افغانستان نوي سلنه نفوس تر خپل پوښښ لاندې راولي
د کلیو دبیارغونې او پراختیا وزیر پوهندوی مجیب الرحمن کریمي نن پنجشنبه د ملي دسترخوان پروګرام په اړه جوړ شوي رسنیز کنفرانس کې وویل، چې د دې پروګرام له لاري به هغو بیوزله کورنیو سره مرسته کیږي چې د کرونا ناروغۍ له امله یې اقتصادي زیان لیدلې دی او یا یې سرپرستان مېرمنې، د زیات عمر لرونکي او معذوره کسان وي.
د کلیو بیارغونې او پراختیا وزیر ښاغلي کریمي زیاته کړه، دا پروګرام به په دوو پړاونو کې تطبیق شي چي په لومړي پړاو کې د هیواد د ۳۴ ولایتونو له ۱۲۳ ولسوالیو څخه به ۱۲۸۹۶ کلي چې په هغه کې به ۱،۸۵ میلیونه کورنۍ شامل وی تر پوښښ لاندی راولي او په دویم پړاو کې به د ۲۳۴ولسوالیو څخه ۲۱۸۲۴ کلي چې پکې ۲،۷ میلیونه کورنۍ شاملې دي، ۲،۵ میلیونه اړمنې کورنۍ به ترینه برخمنې شي.
ښاغلي کریمي وویل، ژر به د هېواد په زر کلیو کې دغه پروګرام پیل شي او نورو کلیو ته به هم وغځيږي.
د یادونې وړ ده چې څارنه، شفافیت او حساب ورکونه په ملي دسترخوان برنامه کې یو مهم اصل دی او ټول ښکیل بنسټونه لکه د کلیو پراختیایي شوراګانې، علماء، د جوماتونو ملا امامان، مخور او بانفوذه مشران، مدني ټولنې، رسنۍ ښوونکي او ځوانان یې په پلي کیدو کې رغنده ونډه لري.
