د افغانستان په کلیو کې د انرژۍ اغیزناکتیا او د تجدید وړ انرژۍ د کارونې سیمینار
د افغانستان د کلیو پراختیا انسټيټیوټ د چهار شنبې پر ورځ (۲۷ سلواغه) «د افغانستان په کلیو کې د انرژۍ اغیزناکتیا او د تجدید وړ انرژۍ د کارونې سیمینار» د افغانستان د تجدید وړ انرژۍ له ټولنې سره په همغږۍ د وزارت د ۷۰ تنو کارکوونکو ، د یادې ټولنې د چارواکو او همکارانو او د خصوصي شرکتونو د استازو په ګډون د کلیو بیا رغونې او پراختیا وزارت په مرکزي تالار کې تر سره شو.
د تجدید وړ انرژۍ ټولنې مشر محمد معروف ضیايي د سیمینار ګډونوالو ته وویل چې افغانستان د انرژۍ لوړ ظرفیت لري، د هغې سروې له مخه چې په ۲۰۱۴ م کال کې تر سره شوې له مخه یې په افغانستان کې د انرژۍ ظرفیت دومره لوړ دی چې سربیره پر خپلو اړتیاوو پوره کولو بهر ته یې هم صادرولی شي.
د کلیو بیا رغونې او پراختیا وزارت د تلپاتې انرژۍ د پروګرامونو رییس اجمل شینواري د خپلو خبرو په ترڅ کې وویل چې د اقلیم د بدلون ستونزې ته په پام د تجدید وړ انرژي او د تلپاتې انرژۍ له ټکنالوژۍ ګټه اخستل نن سبا د نړۍ د تودو بحثونو څخه ده.
په دې سیمینار کې د افغانستان په کلیو کې د نویو ټکنالوژیو د کارولو د پیژندګلوۍ او د تجدید وړ انرژۍ د ګټو او تحفظ په اړه پریزینټیشنونه تر سره شول او په پای کې د تجدید وړ انرژۍ ټولنې چارواکو ته د مننې لوحه هم ورکړل شوه.
