روان کال به په ميدان وردګو ولايت کې ۴۳۶ پرمختيايي او رغنيزې پروژې تطبيق شي
د کليو بيارغونې او پراختيا وزير د چهارشنبې په ورځ د ميدان وردګو ولايت له والي، په ولسي جرګه کې ددغه ولايت استازو، د ولايتي شورا رئيس او غړو، قومي مشرانو او ځوانانو سره وليدل.
د ميدان وردګو والي مظفرالدين يمين د خبرو پرمهال هلته د کليو بيارغونې او پراختيا وزارت لخوا د تطبيق شويو پروژو په برخه کې د مننې ترڅنګ، اوسنۍ ولسي اړتياوې چې د سړکونو، څښلو اوبو، چک ډېمونو او د وچکالۍ د مخنيوي په برخو کې وې، شريکې کړې.
د کليو بيارغونې او پراختيا وزير پوهنمل مجيب الرحمن کريمي وويل، روان کال په ميدان وردګو ولايت کې د مختلفو برنامو په چوکاټ کې ۴۳۶ ټولګټې او پرمختيايي پروژې پلان شوي چې نيږدې ۴۴۷ مېليونه افغانۍ به پرې ولګول شي.
د کليو بيارغونې او پراختيا وزير زياته کړه، په دغو پروژو کې پلونه، سړکونه، د اوبو رسولو شبکې، استنادي او محافظوي ديوالونه، کانالونه او نورې رغنيزې پروژې شاملې دي.
د يادونې وړ ده، تازه په ميدان وردګو ولايت کې د کليوالي اقتصاد د پياوړتيا ملي پروګرام هم رسما پيل شوی چې د پينځو کالونو په جريان کې به د پور او سپما له ۳۰ اتحاديو سره کابو ۲۰ مېليونه افغانيو بلاعوضه مرسته وشي او په پايله کې به يې ۲۴۰۰ کليوالي مېرمنو ته کاري فرصتونه ايجاد شي.
