په هرات کې تر ټولو اوږد ۳۵۰۰ متره کانال کیندل کیږي
د کلیو بیارغونې او پراختیا وزارت د ولسي تړون ملي پروګرام له لوري د هرات ولایت په زنده جان ولسوالۍ کې د اوبو لګولو د ۳۵۰۰ متره اوږد کانال د کیندلو کارپیل شو. په دغه کانال ۴۵ میلیونه افغانۍ لګښت راځي چې د زنده جان ولسوالۍ اړونډ د ۱۶ پراختیایي شوراګانو په وسیله یې کار پرمخ وړل کیږي. دا کانال د ۶ زره هکتاره ځمکې د خړوبولو ظرفیت لري چې د نوموړې ولسوالۍ شاوخوا ۴۰ زره کورنۍ به ترینه برخمنې شي. دا د هرات ولایت په کچه داوبو لګولو لومړۍ کانال دې چې د ۱۶ پراختیایي شورا ګانو لخوا کیندل کیږي او د نوموړو شوراګانو ټول غړې به د هغه د کار د بهیر څارنه وکړي. همدارنګه د کلیو د بیارغونې او پراختیا وزارت د ولسي تړون ملي پروګرام چارواکي وایي چې دا د هرات ولایت په کچه لوي کانال دې چې ددې برنامې لخوا کیندل کیږې. د یادونې وړ ده چې نوموړي کانال په یوه ثانیه کې د ۱۰ متره مکعبه اوبو د جریان توان لري چې د زنده جان ولسوالۍ اوسیدونکو ته به د کرنې او اوبو لګولو په برخه کې زیاتې آسانتیاوې رامنځته کړي.
