د کلیو د بیارغونې او پراختیا وزارت محترم وزیر د لغمان ولایت له والي سره وکتل
د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب نن په خپل کاري دفتر کې په داسې حال کې چې د دغه وزارت د پلان او پالیسي مرستیال مولوي شرف الدین مسلم هم شتون درلود، د لغمان ولایت له والي الحاج قاري بختیار معاذ سره لیدنه وکړه.
د لیدنې په پيل کې د لغمان ولایت والي په یاد ولایت کې د بېرته راستنیدونکو کډوالو په هکله له وزیر صاحب سره خبرې وکړې او د پاکو اوبو رسولو په برخه کې د کډوالو شته ستونزې يې شریکې کړې.
ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب د لغمان ولایت والي ته د ښه راغلاست ترڅنګ وویل: د کلیو د بیارغونې او پراختیا وزارت د پروژو د پلي کولو پرمهال لومړیتوبونه په پام کې نیسي او د متوازن انکشاف له مخې کار کوي. دا زموږ مسؤلیت دی ترڅو هېواد ته بېرته راستنیدونکو کډوالو لپاره د اوبو رسولو پروژې پلې کړو او د کلیو د بیارغونې او پراختیا وزارت به د خپل شته امکاناتو سره سم د کډوالو ستونزو ته رسېدنه وکړي.
