په میدان وردګو ولایت کې (۶۶) بیلابیلې پروژې ګټې اخیستنې ته وسپارل شوې
د کلیو د بیارغونې او پراختیا ریاست تر چتر لاندې، د ایکو (ECHO) بنسټ په مالي مرسته او د PIN نړیوالې مؤسسې له لوري د میدان وردګو ولایت په سیداباد، جغتو او حصه اول بهسودو ولسوالیو کې د څه کم دوه میلیونه امریکایي ډالرو په ارزښت د (۶۶) بیلابیلو پروژو چارې بشپړې او ګټې اخیستنې ته وسپارل شوې. دغه پروژې د یادو بنسټونو د عامه حفظ الصحي په واسطه د کورنیو او ټولنو د وړتیا او ظرفیت لوړولو تر سرلیک لاندې په یادو دریو ولسوالیو کې د یو کال په جریان کې بشپړې شوې دي، چې پکې د ۵۰ څښاک اوبو څاګانو بیارغول، د ٩ کاریزونو اساسي رغول، ٧ بابه مبرزونه، ۱۰۰ د کثافاتو راټولولو سطلونه، پر ٣۲۵۰ کورنیو نقدي مرستې او پر ۳۲۷۴ کورنیو د روغتيايي بستو ویشل شامل دي. د یادونې وړ ده چې د یادو ساختماني پروژو د پلي کولو پر مهال ۲۶۷۸ کاري ورځې رامنځته او ګڼ شمېر کسانو ته پکې د کار زمینه برابره شوې ده.
