د کلیو د بیارغونې او پراختیا وزارت د غونډو په تالار کې د ملکي خدمتونو د کارکوونکو د کړنو د ارزونې بهیر د تشریح درې ورځنی ښوونیز پروګرام پیل شو
د ملکي خدمتونو د کارکوونکو د کړنو د ارزونې فورمې د تشریح کولو درې ورځنی ښوونیز پروګرام د وزارت د بشري سرچینو ریاست او د اداري اصلاحاتو او ملکي خدمتونو ادارې له خوا د کلیو د بیارغونې او پراختیا وزارت د غونډو په تالار کې پیل شو.
د پروګرام په پيل کې د کلیو د ودانیزو چارو مرستیال مفتي سید احمد مستقیم نوموړي هیئت ته د ښه راغلاست ترڅنګ وویل: په دولتي ادارو کې دنده یو مسئولیت او امانت دی، د هر کارکوونکي لپاره يې ترسره کول اړین دي او د ملکي خدمتونو کارکوونکی باید د قانون او اسلامي شریعت په چوکاټ کې خپلې دندې ترسره کړي.
وروسته د اداري اصلاحاتو او ملکي خدمتونو ادارې عمومي رئیس مولوي عبدالحنان عارف الله د ملکي خدمتونو د کارکوونکو د ارزونې بهیر په اړه خبرې وکړې او دغه بهیر يې د ملکی خدمتونو د کارکوونکو د کار د پرمختګ په برخه کې اغیزمن او ارزښتناک وګڼه .
یاد ښوونیز پروګرام د کلیو د بیارغونې او پراختیا وزارت کارکوونکو ته د اداري اصلاحاتو او ملکي خدمتونو ادارې د کارپوهانو له خوا د دریو ورځو لپاره ترسره کیږي.
