د کلیو د بیارغونې او پراختیا وزارت سرپرست وزیر د زابل ولایت له سپین ږیرو سره وکتل
د کلیو د بیارغونې او پراختیا وزارت سرپرست وزیر الحاج م لا محمد یونس اخندزاده په خپل کاري دفتر کې د زابل ولایت له سپین ږیرو، علماوو، مشرانو او مخورو سره لیدنه وکړه.
په دغه لیدنه کې راغلو مشرانو هر یوه مولوي احمدالله، قومندان سید رحیم، استاد حکیم الله، رحمت الله، حاجي عبدالسلام، مولوي عبدالعلي، حاجي محمد غني، قومندان ګل محمد، سرمعلم محمدالله، م لا ګلاب الدین او عیسی محمد په خپل نوبت سره وزیر صاحب ته د بیارغونې پروژو او د خپلو سیمو ستونزې بیان کړې. دوی وزیر صاحب څخه وغوښتل ترڅو د زابل ولایت لرې پرتو سیمو کې د کانالونو، استنادي دیوالونو، سړکونو او د اوبو رسولو په برخه کې له دوی سره مرسته وکړي.
د کلیو د بیارغونې او پراختیا وزارت سرپرست وزیر د زابل ولایت مشرانو ته اطمینان ورکړ هر هغه پروژې چې د خلکو په ګټه وي هغه به عملي شي، د زابل ولایت ټولې پروژې به د ااا د اصولو سره برابرې وي او خلکو ته به د اوبو رسولو او نور پراختیایي پروژو په برخه کې لازم اقدامات وکړي.
