په هرات ولایت کي د کوچیانو لپاره د ۷ پرمختیایي پروژو کار پیل شو
د کلیود بیارغونې او پراختیا وزارت د ولسي تړون ملي پروګرام له لوري د هرات ولایت په ۳ ولسوایو کې د نیمه ګرځنده کوچیانو لپاره د ۱۰ میلیونه افغانیو په ارزښت د ۷ پراختیایي پروژو د جوړولو کار پیل شو.
ټولې ۷ پراختیایي پروژې د هرات ولایت د پشتون زرغون، زنده جان او زیرکوه په ولسوالیو کې د کوچیانو د پراختیایي شوراګانو په وسیله پلې کیږي.
پدې پروژو کې د څښاک د پاکو اوبو شبکې شاملې دي چې څښاک پاکو اوبو ته د کوچیانو د لاسرسي په موخه جوړیږي. ددې پراختیایي پروژو له ډلې څخه، ۴ پروژې یې د هرات ولایت د پشتون زرغون، يوه یې د زنده جان او دوه نورې یې د زیرکوه په ولسوالیو کې پلې کیږي.
په هرات ولایت کې به د کوچیانو د ایلبند شاوخوا ۲۰۰۰ تنه اوسیدونکي له دې ټولو ۷ پروژو څخه برخمن شي او همدارنګه د دې پروژو په پلي کیدو سره به شاوخوا ۳۵۰۰ تنو ځایي اوسیدونکو ته کاري ورخې رامنځته شي.
