په پکتیکا کې د څه باندې ۵.۲ میلیونه افغانیو په لګښت د اوبو رسولو یوه لمریزه شبکه ګټې اخیستنې ته وسپارل شوه
د کلیو د بیارغونې او پراختیا وزارت په کلیوالي سیمو کې د اوبو رسولو او حفظ الصحې د پروګرام له لوري ؛ د پکتیکا ولایت د یوسفخېلو ولسوالۍ په «بوخان خېلو» کلي کې د څه باندې ۵.۲ میلیونه افغانیو په لګښت سره، د اوبو رسولو یوه لمریزه شبکه جوړه او د خلکو ګټنې ته وسپارل شوه.
په دغه پروژه کې د ۱۰۳ مترو په ژوروالي سره د یوې څاه کیندل، د ۵۰ متره مکعب په ظرفیت سره د یوې ذخیرې جوړول، د ۵۶۷۱ مترو په اوږدوالي د پایپونو د شبکې غځول، د ۳۶ لمریزو تختو نصبول او په کورونو کې د ۱۱۰ مېترونو او ۱۱۲ نلکو نصبول شامل وو.
ددغې پروژې په تکمیلېدو سره د شاوخوا ۳۱۳ کورنیو او ۲۹۵ ښځینه زدهکوونکو لپاره د څښلو پاکې اوبه برابرې شوې. او د اړوندې سیمې د ځايي خلکو لپاره یې شاوخوا ۲۴۰ کاري ورځې هم رامنځته کړې.
