په پکتیا ولایت کې د (۱۶۹) پراختیايي پروژو چارې پیل شوې
د کلیو د بیارغونې او پراختیا وزارت له لوري د پکتیا ولایت په زرمت ولسوالۍ کې د شاوخوا (۲۳۶) میلیونه افغانیو په لګښت د (۱۶۹) پراختیايي پروژو چارې نن د یوې غونډې په ترڅ کې د دغه وزارت د سرپرست وزیر الحاج ملا محمد یونس اخندزاده صاحب او مل پلاوي له خوا پیل شوې.
د یادو پروژو د پیل په پار جوړه شوې غونډه کې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده صاحب، مل پلاوي، د پکتیا ولایت والي حاجې مهرالله حماد صاحب او د یاد ولایت د کلیو د بیارغونې او پراختیا رئیس مولوي مرزا جان صادق، د دغه ولایت یو شمیر نورو مسؤولینو، د یادې ولسوالۍ علماء کرامو، سپین ږیرو او ځواناو ګډون کړی وو.
په یاده غونډه کې د کلیو د بیارغونې او پراختیا وزارت سرپرست وزیر صاحب خپله ارزښتناکه وینا وکړه او وویل: دا نظام په ډیرو لویو قربانیو راغلی دی، موږ او تاسې باید د دغه نظام قدر وکړو او شکر ادا کړو.
دغه راز وزیر صاحب زیاته کړه چې د کلیو د بیارغونې او پراختیا وزارت د متوازن انکشاف لپاره ژمن دی او د خپلو امکاناتو په پام کې نیولو سره د پروژو تطبیق د هېواد لېرو پرتو سیمو ته جاري ساتلي دي.
په دغو پروژو کې د کلیوالي سړکونو، پلونو، پلچکونو، استنادي دیوالونو او کانالونو جوړول شامل دي.
د یادو پروژو د کار په جریان کې به سلګونه تنه کاریګرو ته د کار زمینه برابره او په بشپړیدو سره به يې په اړوندو برخو کې د نوموړې ولسوالۍ د اوسیدونکو ستونزې هوارې شې.
