په پکتيا کې د ۱۰ ميليونه ډالرو په ارزښت د ۱۰۳ ښوونځيو د جوړولو کار پیل شو

د کليو بیارغونې او پراختیا وزارت د ولسي تړون ملي پروګرام د اقراء پروژې تر سیوري لاندې د پکتيا ولایت په مرکز او ولسواليو کې د ۱۰۳ ښوونځيو لپاره د ودانيو جوړولو کار رسماً پیل شو.
د کليو بیارغونې او پراختیا وزیر پوهندوی مجیب الرحمن کریمي په پکتيا کې په همدې تړاو جوړو شويو مراسمو ته وویل، چې په پکتيا کې به د لس ميليونه ډالرو په ارزښت ۱۰۳ ښوونځيو ته ودانۍ جوړې شي، چې ۴۳ زره زده کوونکو ته به د ښوونې او روزنې وړ چاپېريال برابر کړي.
د ښاغلي کریمي په وینا یاد وزارت توانیدلی، چې په ۱۳۹۸ کال کې په پکتيا کې د څښاک اوبو چمتو کولو، ترانسپورټ، اوبه خور، د مېرمنو د اقتصادي پیاوړتیا او کلیوالي سيمو ته د برېښنا رسونې په برخه کې ۱۳۲ پروژې بشپړې کړي، چې ۱۲۳ ميليونه افغانۍ ارزښت لري او ۱۳۷۰۰۰ کاري ورځې یې ایجاد کړي وې.
د کليو بیارغونې او پراختیا وزیر وویل، چې د اوبو رسونې، اوبه خور، اقتصاد، ترانسپورت او انرژۍ په برخو کې د ۹۶۷ ميليونه ميليونه افغانیو په ارزښت د څه کم ۶۰۰ سوه پروژې پلان شوي، چې څه کم څلور سوه زره کورنۍ به ترې ګټه واخلي او اوس په پکتيا کې د ۲۶۳ پروژو کارونه روان دي، چې په ترڅ کې به دوه لکه او څلوېښت زره کاري ورځي رامنځته شي. د دې ترڅنګ د کليو بیارغونې او پراختیا وزیر زیاته کړه، چې د لېرې پراتو سيمو لپاره د لمریزې برېښنا د برابرولو په برخه کې ځاځي اریوب او ډنډپټان ولسوالیو کې د ۱۴۶۶۵ کورنیو سروي شوې او همدا راز باید ووایو چې د کليو بیارغونې او پراختیا وزارت د کليوالي اقتصاد پرمختیا پروګرام توانیدلی، چې د مرکز ګردیز او احمد اباد ولسوالۍ ۱۶۱ کلي تر پوښښ لاندې راولي او د سپما ۱۲۸۸ ګروپونه به جوړ کړي، چې له دې ټولنو سره ۸۶،۹ ميليونه افغانۍ مرسته هم کېږي او اوس په پکتيا کې ۱۲۸۸۰ وګړي چې ډېری یې ښځې دي، د دې پروګرام څخه ګټه اخلي.