په هرات ولایت کې د کلیوالي بازار نندارتون جوړ شو
د کلیو د بیارغونې او پراختیا وزارت د کلیوالي اقتصاد د پیاوړتیا ملي پروګرام د کرونایې حالت په ښه کېدو او دکوید ۱۹ وایروس د لومړۍ څپې په راکمېدو سره د «د کلیوالي بازار» تر نوم لاندې په هرات ولایت کې یو نندارتون جوړ کړ.
دا نندارتون د پنجشنبې په ورځ د پوهنې وزارت وزیرې، د کلیو د بیارغونې او پراختیا او د ښځو چارو د ریاستونو د استازو، مدني فعالانو، رسنیو او د دې ولایت د یو شمېر اوسېدونکو پر وړاندې د هرات ولایت د ترقۍ په پارک کې پرانیستل شو، چې د پروګرام ۶۰ تنه ګټه اخیستونکو له هرات، غور، بادغیس او فراه ولایتونو څخه په دې نندراتون کې خپل لاسي تولیدات نندارې او پلورنې ته وړاندې کړل.
د یادونې وړ ده، چې یاد نندارتون د کرونا وایروس د لومړۍ څپې نه وروسته لومړنی نندارتون دی، چې په سیمه ییزه کچه جوړ شو او تر دوه راتلونکو ورځو به په هرات ولایت کې روان وي.
