په فاریاب ولایت کې د اوبو یو بند ګټې اخیستنې ته وسپارل شو
د کلیو د بیارغونې او پراختیا وزارت له لوري د فاریاب ولایت د خواجه سبز پوش ولسوالۍ په قره شیخي کلي کې د څه باندې (۶،۱) میلیونه افغانیو په لګښت د اوبو د یوه بند د جوړولو چارې بشپړې او نن د یوې غونډې په ترڅ کې د دغه وزارت د محترم وزیر الحاج ملا محمد یونس اخندزاده صاحب له خوا رسمآ ګټې اخیستنې ته وسپارل شو.
په دې غونډه کې د کلیو د بیارغونې او پراختیا وزارت محترم وزیر الحاج ملا محمد یونس اخندزاده صاحب، د فاریاب ولایت والي مولوي عبدالاحد فضلي، مل پلاوي، د علماوو شورا رئیس مولوي عبدالجلیل شهیدخيل، د یاد ولایت د کلیو د بیارغونې او پراختیا رئیس مولوي علاوالدین حق پرست، یو شمېر نورو مسئولینو، علماء کرامو، سپین ږیرو او ځوانانو ګډون کړی وو.
په یاده غونډه کې د کلیو د بیارغونې او پراختیا وزارت محترم وزیر صاحب ارزښتناکه وینا وکړه او وویل: زموږ او ستاسو دنده ده چې له اسلامې نظام څخه ساتنه وکړو او د اسلامي نظام تقاضا دا ده چې په ټول هېواد کې عدالت وي، په کوم هېواد کې چې عدالت وي ستونزې نه رامنځته کیږي.
همداراز محترم وزیر صاحب زیاته کړه چې د کلیو د بیارغونې او پراختیا وزارت خپلو ژمنو سره سم په دې توانیدلی ترڅو د هېواد په لرو پرتو سیمو کې د خلکو د غوښتنو سره سم بیلابیلې پراختیايي پروژې پلي او عملي کړي.
د اوبو دغه بند (۴۱،۵) متره اوږدوالی، (۳) متره لوړوالی او (۱۸) متره عرض لري
د یاد بند د کار په جریان کې لسګونه تنه کاریګرو ته د کار زمینه برابره شوې وه او په بشپړیدو سره یې د نوموړي کلي سلګونه جریبه کرنیزه ځمکه خړوبه شي.
