د کلیو د بیارغونې او پراختیا وزیر محترم الحاج ملا عبداللطیف منصور د اهل تشیع د علماوو ټولنې او قومي مشرانو له رئیس او ولایتي مخورو سره وکتل
د کلیو د بیارغونې او پراختیا وزیر محترم الحاج ملا عبداللطیف منصور د اهل تشیع د علماوو ټولنې او قومي مشرانو له رئیس محترم حجتالاسلام سید حسن فاضلزاده او د کابل، میدان وردګ، غور، بامیان، غزني او پکتیا ولایتونو د اهل تشیع له یو شمېر علماوو او قومي مخورو سره وکتل.
په دې لیدنه کې محترم وزیر د اسلامي نظام د ټینګښت په برخه کې د اهل تشیع د علماوو او قومي مشرانو رول مهم او ارزښتناک وباله او هغوی ته یې د کلیو د بیارغونې او پراختیا وزارت د روانو پروژو په اړه معلومات وړاندې کړل.
ورپسې د اهل تشیع د علماوو ټولنې او قومي مشرانو رئیس او ورسره مل پلاوي د وزیر صاحب جهادي سابقه او د هېواد د بیارغونې او آبادۍ په برخه کې د هغه هڅې وستایلې او ټینګار یې وکړ، چې دوی به د اسلامي نظام د ټینګښت او ثبات لپاره له اسلامي امارت سره اوږه په اوږه ولاړ وي.
همدارنګه محترم وزیر هغوی ته ډاډ ورکړ، چې د کلیو د بیارغونې او پراختیا وزارت به د شته امکاناتو او د متوازنې پراختیا د اصل له مخې په ټول هېواد کې د پراختیايي پروژو د پلي کولو بهیر لا ګړندی کړي.
