د بېځایه شویو کورنیو د ژوند لومړنیو اسانتیاوو برابرولو ته به ځانګړې پاملرنه وشي
د کلیو بیارغونې او پراختیا نوماند او سرپرست وزیر حیات الله حیات د وزارت په اداري غونډه کې د پروژو په کېفیت، انډولیزتوب او له جګړې بېځایه شویو کورنیو ته د لومړنیو اړتیاوو د برابرولو په اړه سپارښتې وکړې.
په دې غونډه کې د پروګرامونو معین پوپل حبیبي، مالي او ادارې معین معراج الدین شمس او د برنامو رئیسانو شتون درلود.
ښاغلي حیات وویل، چې د جلالتماب جمهور رئیس د سپارښتنې له مخې باید د کورنیو جګړو په سبب بېځایه شویو وګړو ته په بیړنۍ توګه مرستې ورسیږي.
نوموړي زیاته کړه، چې د کلیوالي پرمختیایي شوراګانو په جوړښت باید کار وشي، چې کلیوالي شوراګانې د هېواد په بیارغونه کې ارزښتناکه ونډه ولري او د دولت او خلکو ترمنځ اړیکې لا پیاوړې کړي.
همدا راز د کلیو بیارغونې او پراختیا وزارت د پروګرامونو معین پوپل حبیبي وویل، چې پرمختیایي پروژې به د یو نوي میکانیزم پر بنسټ پلې شي، چې اقتصادي او ټولنیز اغېز به یې لا ډير شي.
