د اقلیمي بدلون په معلوماتي سیسټم کې د اړونده پروژو د معلوماتو داخلولو روزنیز پروګرام
د کلیو بیارغونې او پراختیا وزارت د کلیوالي انرژۍ مارکېټ د بدلون نوښت پروژې (AREMTI) په مالي او تخنیکي مرسته د یادې پروژې د کنفرانسونو په تالار کې د کلیو بیارغونې او پراختیا وزارت د بېلابېلو پروګرامونو استازو ته د چاپېریال ساتنې ملي ادارې د اقلیم بدلون په ملي معلوماتي سیسټم (NCCIS) کې د اقلیمي بدلون اړوند پروژو د معلوماتو داخلولو په هکله یو ورځنی روزنیز پروګرام دایر شو. یاد سیستم د زرغون اقلیم صندوق په مالي مرسته پلې کېدونکې Readiness-II پروژې لخوا جوړ شوی دی او د اقلیم بدلون اړوند ټولو هغو پروژو معلومات باید پکې درج شي چې بشپړې شوې، د تطبیق په حال کې دي یا په راتلونکي کې پلې کېږي. یاد سیسټم د اقلیم بدلون اړوند پروژو لپاره د نه اعتراض لیک تر لاسه کولو په پروسه کې اسانتیا رامنځته کوي او په هېواد کې د اقلیم بدلون اړوند ټول معلومات به په یو ځای کې د لاسرسي وړ وي. په پام کې ده تر څو د کلیو بیارغونې او پراختیا وزارت د اقلیم بدلون اړوند ټولو پروژو معلومات په نیږدې راتلونکي کې په یاد سیستم کې درج او د لاسرسي وړ وګرځي
